Tinatayang aabot sa 2 Milyong Pisong halaga ng mga ari-arian ang naabo sa nangyaring sunog sa isang residential area sa barangay Botocan sa Quezon City kagabi.
Batay sa ulat ng Bureau of Fire Protection (BFP), ala 6:00 kagabi nang sumiklab ang naturang sunog na umabot pa sa Task Force Bravo isang oras ang nakalipas dahil sa dikit-dikit ang may 150 mga bahay na pawang yari sa light materials.
Mag-a-alas 10:00 naman nang ideklarang fire under control ang naturang sunog na kalauna’y naapula naman ganap na alas 12:23 kaninang madaling araw.
Sinasabing nagsimula ang sunog sa ikalawang palapag ng bahay ng isang Felipe Tabon kung saan, tinitingnang sanhi nito ang faulty electrical wiring dulot umano ng paggamit ng jumper.
—-
