Hindi na kailangan pang sumailalim sa 14 na araw na quarantine sa isolation facilities ang mga magtutungo ng Taiwan galing Pilipinas, simula sa susunod na linggo.
Batay ito sa bagong polisiya na ipinalabas ni Taiwan Minister of Health and Welfare Chen Shih-Chung.
Ayon kay Chen, ang nabanggit na pasiya ay kasunod na rin ng bumababang positivity rate ng COVID-19 sa Pilipinas.
Aniya, simula Nobyembre 9, sa bahay na lamang gagawin ang 2 linggong mandatory quarantine at isang linggong self-health management ng mga biyahero mula Pilipinas na walang sintomas.
Oras na matapos na ang isolation period at hindi nakitaan ng anumang sintomas ang biyahero, hindi na kakailanganin pa nitong magpa COVID-19 test.
