Posibleng hindi umabot sa kabuoang sahod o kada buwang sahod ang matatanggap na 13th month pay ng mga empleyado.
Ayon kay Department of Labor and Employment (DOLE) Undersecretary Benjo Benavidez, hindi umano kumpleto ang pasok ng ilang mga empleyado dahil sa pagpapatupad ng skeletal schedule at work suspension ng ilang mga bunsod ng quarantine restrictions sa bansa.
Sinabi pa ni Benavidez, ang matatanggap na 13th month pay ng mga empleyado ay nakabase umano sa kompyutasyon sa kabuoang pasok ng mga empleyado sa loob ng isang taon.
Plano ngayong magpalabas ng advisory ang DOLE upang magabayan ang mga employer at manggagawa kung paano ang tamang kompyutasyon ng 13th month pay.
Idinagdag pa ni Benavidez na ang 13th month pay ay obligasyon ng mga employer at hindi pwede na hindi ito maibigay sa mga empleyado.
Hinimok naman ng DOLE ang mga empleyado na ireklamo sakanilang tanggapan ang mga employer na hindi magbibigay ng sweldo dahil sa hindi pa nababakunahang manggagawa kontra COVID-19. —sa panulat ni Angelica Doctolero