Binulabog ng bomb scare ang bahagi ng EDSA Cubao sa Quezon City.
Ito’y makaraang matuklasan ng isang pasahero na mayrooong hinihinalang bomba sa loob ng sinasakyan nilang bus.
Sa inisyal na report, iniwan umano ng ‘di nakilalang pasahero ang isang abandonadong bag sa dulong bahagi ng Magicline Express Unit habang nasa northbound lane ng EDSA-main avenue bandang alas-7:00 kagabi.
Binuksan ng konduktor na si Jonjon de Leon ang naturang bag at nakita nito ang tatlong mistulang lata ng sardinas at naka-packing tape.
Agad namang rumesponde ang mga awtoridad at kinordon ang lugar.
Matapos ang halos oras na inspeksyon sa nilalaman ng bag, napag-alaman ng bomb disposal team na hindi ito bomba.
Dahil sa insidente, nagdulot ito ng mabigat na trapiko mula Cubao hanggang Ortigas Avenue sa Mandaluyong City.
By Meann Tanbio
