Naniniwala si dating Commission on Elections (COMELEC) Chairman Sixto Brillantes na papabor kay Senadora Grace Poe ang magiging desisyon ng Korte Suprema hinggil sa disqualification case nito.
Ayon kay Brillantes, malakas ang paniniwala niya na papayagan ng Korte Suprema na tumakbo sa pagka-pangulo si Poe.
Sa takbo aniya ng mga oral argument kung saan dumadalo din siya, nakikita nya’ng walang dahilan para hindi payagan ng Korte Suprema ang pagkandidato ni Poe.
Idinagdag pa ni Brillantes na sa paraan pa lamang ng pagtatanong ng mga mahistrado, mahuhulaan na agad kung kanino kakampi ang mga ito gaya ni Chief Justice Ma. Lourdes Sereno.
“Makikita mo si Chief Justice Sereno kitang-kita mo na parang kampi kay Poe, pero kung titignan mo naman si Justice Carpio, napakaliwanag din naman na ayaw kay Grace Poe, nakita mo yung si Justice de Castro yung babae, ayaw din kay Grace Poe, pero pakinggan mo naman ang mga tanong ni Justice Leonen, kita mo namang kampi siya kay Grace Poe, talagang ganun lang yun eh.” Pahayag ni Brillantes.
By Mariboy Ysibido | Balitang Todong Lakas
