Pinaigting ng Police Regional Office-Cordillera (PRO-CAR) ang imbestigasyon sa pagkamatay ni Julio Macario Pagat, head ng LandBank of the Philippines (LBP) Benguet Lending Center, matapos bumuo ng special task group para sa naturang kaso.
Na-activate noong Setyembre 30 ang Special Investigation Task Group “Pagat” kasunod ng kahilingan ng Benguet Police Provincial Office. Layunin nitong tutukan ang pagkalap ng ebidensiya at pagtukoy sa mga posibleng sangkot sa insidente.
Natagpuang wala nang buhay ang 56-anyos na si Pagat sa Tuba, Benguet, na may tama ng bala sa ulo.
Kabilang sa mga hakbang ng mga imbestigador ang forensic examination sa biktima at kaniyang sasakyan, pagsusuri sa mga cellphone, pagkuha ng testimonya mula sa mga posibleng testigo, gayundin ang pag-review sa CCTV footage sa lugar.
Sa isinagawang pagsusuri, nakita ang gunpowder residue sa kanang kamay ni Pagat. Napag-alaman din ng pulisya na hindi siya lisensiyadong may-ari ng baril.
Narekober naman sa lugar ang isang homemade .22 Magnum revolver na walang serial number, mga bala, .45-caliber magazine, cash, cellphone, at iba pang personal na gamit.
Kasama rin sa mga ebidensiyang sinusuri ang isang handwritten note na may nakasulat na “MISTAKEN IDENTITY SORRY PO.” Hindi pa matukoy ng pulisya ang kahulugan o kaugnayan nito sa insidente.
Samantala, nananawagan ang Tuba Municipal Police Station sa mga motorista na maaaring may dashcam footage na makatutulong sa imbestigasyon. Partikular na hinihingi ang mga recording mula sa mga dumaan sa Kennon Road mula 7 P.M. noong Setyembre 28 hanggang 4 P.M. noong Setyembre 29, 2026, lalo na sa bahagi ng Camp 3-Twin Peaks sa Tuba, Benguet.
Ayon sa pulisya, maaaring makatulong ang mga footage sa pagtukoy sa mga posibleng suspek, saksi at iba pang mahalagang detalye kaugnay ng krimen. Patuloy naman ang imbestigasyon at forensic examination sa kaso.
