Naitala ng Globe Telecom ang pinakamalakas nitong network performance ngayong taon, batay sa pinakahuling Telco Report Card ng Department of Information and Communications Technology (DICT).
Ayon sa DICT, nakakuha ang Globe ng overall score na 81.5 noong Agosto, mas mataas ng 4.4 puntos kumpara noong Enero.
Umabot naman sa 45.9 Mbps ang average download speed nito—pinakamataas na naitala ng kumpanya ngayong 2026.
Mas mataas ito ng 5.1 porsyento kumpara noong Hulyo at 26 porsyento kumpara sa 36.5 Mbps noong Enero.
Umakyat din sa 71.2 ang network quality score ng Globe mula sa 69.2, habang nanatili sa 20 milliseconds ang latency.
Ayon sa telco, nakatulong sa pagbuti ng serbisyo ang patuloy na pamumuhunan sa network infrastructure, technology upgrades at pakikipagtulungan sa pamahalaan at National Telecommunications Commission (NTC).
Sa unang kalahati ng taon, umabot sa P26.3 bilyon ang capital expenditures ng Globe, kung saan 91 porsyento ay inilaan sa mga data-related initiatives.
Sinabi ni Globe General Counsel Atty. Froilan Castelo na mahalaga hindi lamang ang bilis ng internet kundi ang pagiging stable at maaasahan nito, lalo na sa panahon ng mataas na demand, disruptions at emergencies.
Patuloy din umanong pinapalakas ng Globe ang network resilience gamit ang automation at Automated Outage Response technology, na maaaring makatulong na mapanatili ang hanggang 50 porsyento ng data connectivity kapag may service interruption.
Noong Hulyo, nakapagbigay rin ang Globe ng mobile connectivity sa 52 dating unserved Geographically Isolated and Disadvantaged Areas o GIDAs, bilang bahagi ng connectivity initiative ng DICT.
