Mariing tinutulan ng grupong National Citizens’ Movement for Free Elections ang pagpapaliban sa Barangay at Sangguniang Kabataan Elections ngayong taon.
Ayon sa NAMFREL, nakababahala ang hindi pakikinig ng Kongreso at Ehekutibo sa kanilang panawagan na tutulan ang pagpapaliban sa naturang eleksyon, lalo na’t tila minadali anila ang pagsasabatas nito ilang araw na lamang bago ang paghahain ng Certificate of Candidacy sa Setyembre 28.
Nabatid na nilagdaan ni Pangulong Ferdinand Marcos Jr. ang postponement ng BSKE, na may layong mapabuti ang paghahatid ng serbisyo ng mga kasalukuyang nakaupong opisyal, tapusin ang kanilang mga nasimulang programa, at mas pagtuunan ng pansin ang mga pangangailangan ng kanilang mga nasasakupang komunidad, pamilya, at kabataan.
Gayunman, iginiit ng NAMFREL na matutugunan lamang ang mga problemang nabanggit ng Pangulo kung magkakaroon ng mga bagong pamunuan sa mga barangay, kumpara sa pagpapalawig sa panunungkulan ng mga opisyal na hindi sumailalim sa panibagong pagboto ng mga Pilipino. | Sa panulat ni Terence Molave
