Iginiit ni Dominic “Doc” Ligot, director ng Philippine AI Business Association, na kulang pa ang AI education sa mga paaralan sa bansa.
Ayon kay Ligot, sa halip na tuluyang ipagbawal ang paggamit ng Artificial Intelligence (AI) dahil sa pangambang magamit ito sa pandaraya, dapat umanong turuan ang mga estudyante ng tamang paggamit nito.
Kabilang dito ang pagkatuto kung paano mag-prompt, kung kailan maaaring gumamit ng AI, at kung paano ito gagamitin nang naaayon sa ethical standards.
Inihalintulad ni Ligot ang AI sa calculator na dati ring kinontra ng ilang sektor sa edukasyon dahil sa pangambang magamit sa pandaraya.
Para sa kaniya, dapat magsimula sa mga paaralan ang wastong AI education upang matutuhan ng mga estudyante ang responsable at makabuluhang paggamit ng teknolohiya.
