“HINDI NAMAN KAMI UMAASA SA NUMERO!”
Ito ang iginiit ni House impeachment adviser at spokesperson Robert Ace Barbers, kaugnay sa usapin ng conviction ni Vice President Sara Duterte.
Kasunod ito ng pahayag ng ilang senator-judge na mahihirapan ang prosecution na makuha ang threshold vote kung walang sapat na ebidensya at mga testigo.
Sa press conference, nagpahayag ng kumpiyansa si Barbers na malakas at matibay ang mga ebidensya at testigong inihaharap ng prosecution, anuman ang maging desisyon ng mga senator-judge sa kailangang boto para sa conviction.
Nilinaw ni Barbers na ang voting threshold ay hindi batayan ng paglalatag ng kanilang ebidensya at mga testigo, kundi para sa pagpapatibay ng mga alegasyong nakasaad sa apat na articles of impeachment.
Umaasa ang prosecution na ibabatay ng Senate Impeachment Court ang kanilang magiging desisyon sa lakas at bigat ng mga ebidensyang inilahad sa paglilitis para ma-convict si VP Sara. | via Geli Mendez (DWIZ Patrol)
