Hinikayat ni Parañaque 2nd District Rep. Brian Yamsuan ang mga kapwa mambabatas na agarang aksiyunan ang panukalang magpapalakas at titiyak sa tuluy-tuloy na pondo para sa mga programa ng Department of Education para sa kaligtasan sa mga paaralan.
Nabatid na nananatiling nakabinbin ang House Bill 10864 o panukalang Comprehensive School Safety Act na layong bumuo ng National Comprehensive School Safety Framework na magtatakda ng pamantayan para sa school safety plans sa lahat ng pampubliko at pribadong paaralan sa bansa.
Kabilang na ang kinakailangang imprastraktura at mga hakbang sa seguridad na ipatutupad sa sektor ng edukasyon.
Target din nitong magtakda ng pamantayan at protocols para sa proteksiyon ng mga mag-aaral, suporta sa mental health, pag-iwas sa karahasan at mga mekanismo laban sa bullying.
Kasabay nito ay nanawagan si Yamsuan sa mga lokal na pamahalaan na gamitin ang bahagi ng pondong nakalaan sa Special Education Fund (SEF) para matugunan ang problema sa seguridad ng mga pampublikong paaralan sa mga komunidad na kanilang nasasakupan.
Ang panawagan ni Yamsuan ay kasunod ng madugong pamamaril sa Banga National High School sa South Cotabato kung saan tatlong estudyante ang nasawi at may mga nasugatan.
Ito na ang ika-siyam na insidente ng karahasan sa loob at labas ng mga paaralan na naiulat sa loob lamang ng tatlong buwan.
