Hindi pinagbigyan ng Kamara ang mosyon ni Navotas Rep. Toby Tiangco na buksan muli ang plenary deliberations sa panukalang 2027 budget ng Congress of the Philippines na aabot sa P27 billion.
Nabatid na ilang beses tumayo si Tiangco para kuwestiyunin ang pagbabago sa schedule ng deliberasyon sa budget ng Kongreso na nakatakda sanang talakayin sa September 24, pero isinalang na ito noong September 17 at agad na na-terminate dahil walang interpellators.
Ito ang nagmitssa para i-terminate o agad na tapusin ang pagtalakay sa pambansang pondo ng Senado at Kamara para sa susunod na taon.
Iginiit ng mambabatas na dapat itong i-reopen para sa transparency at accountability, gaya ng ginawa sa MMDA.
Paliwanag naman ni House Deputy Majority Leader Bernadette Escudero, kinailangang i-adjust ang schedule dahil sa pagde-delay ng budget deliberations ng ilang ahensya ng gobyerno.
Para kay Tiangco, hindi aniya magandang tingnan na tinapos ang deliberasyon at ipinasa nang walang paliwanag ang panukalang pondo ng Congress of the Philippines tungo sa transparency at accountability.
Bilang tugon, sinabi naman ni Deputy Speaker Janette Garin na willing naman aniya ang Kamara na talakayin ito pero “out of order” ang mosyon ni Tiangco batay sa Section 105 ng House Rules, kaya ito ay ibinasura.
