Tinawag ni Bicol Saro Party-list Representative Terry Ridon na isang “malaking tagumpay” ang pagpapalabas ng subpoena ng Senate Impeachment Court para sa Anti-Money Laundering Council (AMLC) reports, bank, at tax records ni Vice President Sara Duterte.
Ayon kay Cong. Ridon, dati pa nilang iginigiit ang kahalagahan ng naturang mga dokumento, ngunit ngayon aniya ay kinilala na rin ng mismong Senate Impeachment Court ang pangangailangan na suriin ang mga ito.
Aniya, makatutulong ang mga dokumento upang maitatag ang baseline ng yaman ng isang public official, partikular ang impeachable official na si VP Sara.
“So ibig sabihin, lahat ng AMLC documents, bank records, at BIR documents ay nais suriin ng Senate Impeachment Court,” ayon kay Ridon.
Sinabi rin ni Cong. Ridon na hindi bababa sa limang bangko ang saklaw ng subpoena. Kabilang umano sa mga dokumentong maaaring isumite ng mga bangko ang statement of accounts, ledger, at bank statements na nakapangalan kay Vice President Sara Duterte, kabilang ang mga joint accounts.
Aniya, maaaring umabot ang coverage ng subpoena mula 2007 hanggang kasalukuyan, bagama’t may ilang dokumentong maaaring limitado sa limang taong retention period depende sa record na hinihingi.
Hindi na rin aniya kailangan ng approval ng Pangulo para sa bank records. Tanging mga dokumento mula sa Bureau of Internal Revenue (BIR) ang nangangailangan umano ng naturang pahintulot, kung saan ang ahensya ang makikipag-coordinate sa Malacañang.
