Hinamon ni IBON Foundation Executive Director Sonny Africa ang mga employer na nagrereklamong hindi nila kayang ipatupad ang P85 wage increase na ilabas ang kanilang financial statements upang mapatunayan ang kanilang pahayag.
Ayon kay Africa, nakabatay ang kanilang pagsusuri sa datos ng Philippine Statistics Authority (PSA) na sumasaklaw sa iba’t ibang laki ng negosyo, industriya, at rehiyon sa bansa.
Para sa National Capital Region (NCR), sinabi niyang maliit na bahagi lamang umano ng kita ng mga negosyo ang maaapektuhan ng dagdag-sahod. Aniya, nasa humigit-kumulang 6% lamang ang magiging epekto nito sa micro at small enterprises, habang nasa 4.7% naman para sa malalaking kumpanya.
Giit ni Africa, kung totoong hindi kakayanin ng mga negosyo ang dagdag-sahod, dapat itong mapatunayan sa pamamagitan ng kanilang financial records at kung ginagamit lamang ang banta ng pagtaas ng presyo, pagsasara ng negosyo, o tanggalan bilang dahilan, maaaring nakatuon lamang ito sa pagprotekta sa kita ng mga kumpanya.
