Mariing kinondena ng ilang kongresista ang AI-generated video na inilabas ng China Daily na naglalarawan sa mga Pilipino bilang mga unggoy na umano’y sunod-sunuran sa Estados Unidos at Japan.
Ayon kay Akbayan Party-list Rep. Perci Cendaña, nakakasira at nakakasakit ang patuloy na pag-atake ng China sa soberanya at dignidad ng mga Pilipino.
Iginiit naman ni House Senior Deputy Minority Leader at Mamamayang Liberal Party-list Rep. Leila de Lima na kahit anong pang-aalipusta, pananakot, at disinformation ang gawin ng China, hindi nito mababago ang katotohanang bahagi ng teritoryo ng Pilipinas ang West Philippine Sea.
Para naman kay Pinoy Workers Party-list Rep. Karl Josef Fernandez, hindi kayang yurakan ng propaganda o smear campaign ng China ang dangal ng mga Pilipino, at hindi rin nito mabubura ang tagumpay ng bansa sa 2016 Arbitral Award.
Bukod sa mga nabanggit na kongresista, nakibahagi rin sa pagkondena sina Representatives Paolo Ortega, Jay Khonghun, Zia Alonto Adiong, at Ernix Dionisio ng House Young Guns.
Ayon sa kanila, ang pangungutya ng China sa mga Pilipino ay patunay na wala na itong maipakitang legal na batayan sa patuloy nitong pag-aangkin sa mga bahagi ng West Philippine Sea.
Nanawagan ang mga mambabatas na manatiling nagkakaisa ang mga Pilipino sa pagtatanggol sa soberanya, dignidad, at karapatan ng bansa sa sariling teritoryo. | via Geli Mendez (Patrol 30)
