Maghahain pa ang House Prosecution Panel ng karagdagang mga testigo kaugnay ng Article 4 ng Articles of Impeachment laban kay Vice President Sara Duterte, na tumatalakay sa umano’y pagbabanta laban kay Pangulong Ferdinand Marcos Jr. at kaniyang pamilya.
Ayon kay Impeachment Court Spokesman Atty. Regie Tongol, hindi si National Bureau of Investigation Director Melvin Matibag ang huling testigong ihaharap ng prosekusyon kaugnay sa grave threats laban sa bise presidente.
Kinumpirma ni Atty. Tongol na may iba pang mga witness ang nakatakdang iharap ng prosecution, bagama’t hindi pa inilalantad ang kanilang pagkakakilanlan.
Nauna nang iniatras ng prosekusyon ang pagharap sa impeachment court nina Office of the Vice President Chief of Staff Zuleika Lopez at House Legislative Security Bureau Executive Director Capt. Belinda Bello bilang testigo sa paglilitis.
Dahil dito, posibleng paikliin ang 11 trial days na nakalaan para sa pagtalakay ng Article 4 sa ilalim ng siyamnapu’t dalawang araw na schedule ng impeachment trial.—sa panulat ni Jordan Gutierrez
