Mariing pinabulaanan ng House Prosecution Panel na scripted ang mga testimonya ni National Bureau of Investigation o NBI Regional Dir. Atty. Jeremy Lotoc sa ginanap na Day 4 ng impeachment trial laban kay Vice President Sara Duterte.
Kasunod ito ng pagpuna ng defense team sa paggamit ng notes ni Lotoc sa gitna ng paglilitis.
Sa pulong balitaan, sinabi ni House Prosecutor at Manila Rep. Joel Chua na walang katotohanan ang mga paratang sa witness.
Aniya, ang paggamit ni Lotoc sa “notes” ng NBI ay pinayagan ng Senate Impeachment Court dahil kasama aniya ito sa naging proseso ng kanilang imbestigasyon.
Una nang nilinaw ni Private Prosecutor Amando Virgil Ligutan na wala sa Rules of Impeachment na ang magiging tugon ng isang witness ay hindi dapat nakabatay sa “notes” ng testigo.
Ang pahayag ni Ligutan ay inaprubahan ni Senate Presiding Officer Sen. Chiz Escudero, dahilan para magpatuloy ang presentasyon ng Article 4 o grave threat na may kaugnayan sa bantang pagpapapatay ni VP Sara kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez. | via Geli Mendez (Patrol 30)
