Maglulunsad ng malawakang pagsusuri ang kumite na pinamumunuan ni Sen. Erwin Tulfo sa pagpapatupad ng Republic Act 9344 o Juvenile Justice and Welfare Act of 2006.
Ayon kay Tulfo, sisilipin ng Senate Committee on Social Justice, Welfare, and Rural Development ang implementasyon ng batas kasunod ng mga ulat ng serye ng krimen na kinasasangkutan ng mga menor de edad, kabilang ang insidente ng pamamaril sa isang paaralan sa Tacloban at mga kaso ng pananaksak sa Cavite at Negros Occidental.
Matagal na aniyang may malalaking kakulangan sa pagpapatupad ng Juvenile Justice and Welfare Act. Nakita na rin umano niya ang mga epekto ng batas kung saan maraming biktima ng krimen na kinasasangkutan ng mga menor de edad ang lumalapit sa kanilang public service programs at nakararamdam ng kawalan ng magawa dahil sa umiiral na sistema.
Giit pa ng senador, matagal nang may nakikitang kakulangan sa pagpapatupad ng batas, partikular sa pondo at pasilidad para sa Bahay Pag-asa, sa bisa ng mga intervention program para sa Children in Conflict with the Law (CICL) at Children at Risk (CAR), at sa pagpapatupad ng pananagutan ng mga magulang.
Nilinaw ng senador na layunin ng pagsusuri na ayusin ang mga depekto sa implementasyon ng batas upang maibigay ang hustisya para sa mga biktima at ang tamang rehabilitasyon para sa mga menor de edad.
Dagdag pa niya, kukunin ng komite ang pananaw ng mga eksperto sa batas, law enforcement, social welfare groups, simbahan, mga health professional, at mga magulang upang masigurong komprehensibo ang pag-aaral sa isyu.
