Posibleng muling bumaba ang presyo ng mga produktong petrolyo sa susunod na linggo matapos ang pagbaba ng presyo ng langis sa ikatlong araw ng trading sa global market.
Batay sa monitoring, bumaba ng sitenta sentimos kada litro ang diesel, trenta sentimos sa gasolina, at sisenta sentimos sa kerosene o gaas.
Gayunman, hindi pa tiyak ang magiging galaw ng presyo dahil may dalawa pang natitirang araw ng trading na maaaring magpabago sa kasalukuyang galaw ng kalakalan.
Ayon kay Jetti Petroleum President Leo Bellas, may nakikitang posibilidad ng rollback sa susunod na linggo, ngunit hindi ito inaasahang kasing laki ng ipinatupad na bawas-presyo na mahigit onse pesos sa diesel nitong Hunyo a-bente tres.
Maaari rin naman aniyang manatiling walang pagbabago ang presyo ng petrolyo kung mag-iba ang takbo ng kalakalan sa mga susunod na araw.—sa panulat ni Jordan Gutierrez
