Pinarangalan ng pamahalaang panlalawigan ng Pampanga ang isa sa mga nasawing estudyante ng San Jose National High School sa Tacloban City bilang “Pride of Pampanga.”
Ayon sa Pampanga LGU, idineklara nila bilang bayani ang 15-anyos na Grade 10 student na si Chris Lorenz Fabian, na tubong Minalin, Pampanga, bilang pagkilala sa ipinakita niyang katapangan sa gitna ng pamamaril sa naturang paaralan.
Tumungo naman sa Tacloban si Pampanga Vice Governor Dennis Pineda at iba pang mga opisyal ng lalawigan upang personal na iabot ang resolusyon ng pagpupugay sa pamilya Fabian, at upang tulungan ang mga naulila ng nasawing estudyante.
Samantala, pinarangalan din ng Boy Scouts of the Philippines si Fabian, na napag-alamang isang senior scout, sa katapangan na kanyang ipinamalas sa naturang pamamaril. — Sa panulat ni Anjo Riñon
