Nauwi sa trahedya ang masaya sanang selebrasyon ng Regada Festival sa Cavite City kahapon, Hunyo 24, matapos ang insidente ng pananaksak noong halos patapos na ang programa.
Nasaksak sa leeg ang 17-anyos na biktima matapos niyang subukang awatin ang mga nagsusuntukan.Nagsimula ang rambulan sa simpleng sagian. Lubhang napuruhan ang leeg ng biktima na kaniyang ikinasawi kalaunan.
Batay sa ulat, ang naging alitan ay kinasangkutan umano ng tiyuhin ng biktima. Nang umawat ang binatilyo, isa pang lalaki ang sumali sa gulo at dito siya tinamaan ng matigas na bagay na naging sanhi ng kanyang malubhang pinsala.
Nakatakbo pa umano ng ilang metro ang biktima bago bumagsak. Isinugod pa siya sa ospital ngunit idineklara ring dead on arrival matapos matamaan ang ugat sa kanyang leeg.
Hindi pa rin malinaw sa ngayon ang eksaktong ginamit sa pananaksak, ngunit may posibilidad umanong susi ang ginamit na panaksak ayon sa pulisya.
Naaresto na ang isang 34-anyos na suspek na unang nakaalitan ng tiyuhin ng biktima, habang patuloy na pinaghahanap ang itinuturong direktang nakasaksak sa 17-anyos na biktima.
Patuloy pa rin ang imbestigasyon ng Cavite police sa insidente.
