Ipinagtanggol ni dating Philippine Basketball Team at Ateneo Blue Eagles head coach Chot Reyes ang beach o water training dahil matagal na itong ginagawa; ngunit nilinaw din niyang walang aktwal na paglangoy na kasama sa naturang pagsasanay.
Sinabi ito ni Reyes habang ipinapaabot ang kanyang pakikiramay sa pagkasawi ng dalawang atleta ng Ateneo na sina Rene Baterbonia at Divine Adili.
Ayon kay Reyes, mayroon ding water training sa pamamagitan ng pool workouts noong nagsisimula pa lamang siya bilang isang head coach sa PBA; ngunit nilinaw niyang pagtakbo lang sa tubig ang ginagawa ng mga player.
Dagdag pa ng basketball coach, masakit sa kanya ang nangyari dahil personal niyang kilala si Adili dahil nakakasabayan niya ito sa mga pagsasanay ng koponan.
Dahil dito, nanawagan si Reyes sa publiko na itigil ang mga spekulasyon kaugnay ng pagkamatay nina Baterbonia at Adili. — Sa panulat ni Anjo Riñon
