Sugatan ang isang disisyete-anyos na Grade 9 student matapos s*ksakin ng isang Grade 10 sa labas ng isang paaralan sa San Carlos City, Negros Occidental kahapon, June 24.
Ayon sa Police Regional Office Negros Island Region, naganap ang insidente bandang alas-tres kuwarante ng hapon sa labas ng Julio Ledesma National High School sa Barangay Dos, kung saan hinihintay umano ng suspek ang biktima bago isinagawa ang pananaksak.
Nagtamo ng saksak sa tiyan ang biktima at agad na isinugod sa ospital para sa agarang lunas.
Mabilis namang tumakas ang suspek matapos ang insidente, ngunit naaresto rin sa isinagawang follow-up operation ng pulisya, kung saan narekober ang patalim na ginamit sa krimen.
Sa ngayon, patuloy na inaalam ng mga otoridad kung bullying ang posibleng ugat ng insidente.| Sa panulat ni Reabelle Medina
