Kinumpirma ng US Department of Justice ang pagkaka-aresto sa Pilipinas ng isa sa most wanted fraudsters ng Federal Bureau of Investigation at may patong sa ulo na 150 thousand US dollars.
Kasunod na rin ito ng pagdating sa Amerika ni Herbert Leon Kimble matapos maaresto ng mga tauhan ng Fugitive Search Unit ng Bureau of Immigration sa isang casino sa Pasig City.
Ayon sa US DOJ, ilang buwang tinutukan ng immigration agents ang kinaroroonan ni Kimble bago ito tuluyang dinampot.
Batay sa records ng FBI, nag-plead ng guilty si Kimble sa US District Court ng South Carolina, Columbia Division noong April 4, 2019 dahil sa conspiracy charges para lokohin ang Estados Unidos subalit bigo itong lumantad sa itinakdang sentencing hearing noong August 27, 2024 kung kailan din nag-isyu ng arrest warrant laban dito ang federal authorities.
Ayon kay US Acting Attorney General Todd Blanche, si Kimble ay akusado sa pangunguna sa mahigit 1.2 billion dollar Medicare fraud na itinuturing na pinakamalaking healthcare fraud cases na pinanagot sa Amerika.
