Tiniyak ng Malacañang na hindi hahayaan ni Pangulong Ferdinand Marcos Junior na mawala ang kontrol ng Pilipinas sa Bajo de Masinloc kasunod ng naitalang presensya ng mga floating structure ng China sa lugar.
Ayon kay Palace Press Officer Claire Castro, batid ng Pangulo ang sitwasyon at nananatili ang paninindigan nitong daanin sa diplomatik at legal na proseso ang pagharap sa isyu.
Kinumpirma ni Castro na pormal nang naghain ng diplomatic protest ang Department of Foreign Affairs laban sa inilagay na floating movable platform ng China sa nasabing shoal.
Sa pangamba naman ng ilang mamamayan na unti-unting nakukuha ng China ang Bajo de Masinloc, iginiit ng opisyal na hinding-hindi ito papayagan ng Pangulo at patuloy nitong ipagtatanggol ang karapatan at interes ng Pilipinas sa West Philippine Sea.—sa panulat ni Anjo Riñon
