Tiniyak ni House Speaker Dy III ang agarang tulong para sa mga residenteng naapektuhan ng magnitude 7.8 na lindol sa Mindanao.
Ito’y matapos niyang pangunahan ang pagbisita sa General Santos City at Sarangani Province upang suriin ang pinsalang idinulot ng malakas na lindol.
Nakipagpulong rin si Speaker Dy sa mga local officials at regional agency heads upang alamin ang agaran at pangmatagalang hakbang para matulungan ang mga apektadong komunidad.
Sa isinagawang assessment, tiniyak ni Speaker Dy na sasagutin ng Kamara ang gastusing medikal ng lahat ng nasugatan dahil sa lindol, maging sila man ay nasa pampubliko o pribadong ospital.
Layon ng hakbang na matiyak na magiging “zero balance” ang pagpapagamot ng mga biktima upang mabawasan ang kanilang pasanin sa panahon ng pagbangon.
Nangako rin si Speaker Dy na maglalaan pa ng karagdagang tulong upang mapabilis ang pagbangon ng mga pamilyang naapektuhan ng sakuna.
Bukod dito, inatasan na rin ni Speaker Dy ang mga kinatawan ng Kamara na suriin ang mga nasirang gusali, pinsala sa mga ospital, paliparan, kalsada, tulay, at iba pang imprastraktura upang matukoy ang lawak ng rehabilitasyon at kinakailangang pondo.
Tiniyak ni Dy na maisasama sa panukalang 2027 National Budget ang mga pondong kakailanganin para sa pagkukumpuni at muling pagtatayo ng mga pasilidad na nasira ng lindol.
Umaasa naman ang liderato ng Kamara na sa pamamagitan ng mabilis na pagtugon ng pamahalaan, agad na makakabangon ang mga komunidad na naapektuhan ng lindol sa Mindanao. | via Geli Mendez (Patrol 30)
