“Gawa ng diablo.”
Ganito tinawag ni Cubao Bishop Elias Ayuban ang akusasyon ng mga nagpakilalang dating miyembro ng Philippine Marines na may kinalaman sa paghahatid umano ng male-maleta ng pera sa ilang personalidad, kabilang na si Father Flavie Villanueva ng Society of the Divine Word, na may kinalaman sa pagdamay nito sa mga pamilya ng mga biktima ng extrajudicial killings.
Kinumpirma rin ni Bishop Ayuban na walang simbahan ang SVD congregation sa Mindanao Avenue o sa mga lugar malapit dito, taliwas sa ibinunyag ng isa sa mga nagpakilalang ex-marines.
Dagdag pa ng obispo, tanging ang Sacred Heart Parish-Shrine sa Kamuning; Santo Niño de Violago Quasi-Parish sa Barangay Kalusugan; at ang Diocesan Shrine of Jesus, the Divine Word, na katabi ng Christ the King Mission Seminary sa E. Rodriguez Avenue ang mga simbahan na hawak ng SVD sa Diocese of Cubao, o ang katimugang bahagi ng Quezon City.
Dahil dito, nanawagan si Ayuban sa publiko na manatiling mapagmatyag sa paghahanap at pagsasalita ng katotohanan.—sa panulat ni Anjo Riñon
