Sisimulan na ng Regional Tripartite Wages and Productivity Board – NCR ang serye ng konsultasyon kaugnay ng mga petisyon para sa dagdag-sahod sa Metro Manila.
Unang kokonsultahin ang labor sector ngayong Mayo 22, susundan ng employers sa Mayo 28, habang itinakda naman sa Hunyo 18 ang public hearing.
Gayunman, sinabi ng ilang labor groups na hindi dapat umasa ang mga manggagawa sa malaking wage increase.
Ayon kay Josua Mata ng Sentro ng mga Nagkakaisa at Progresibong Manggagawa, malabong umabot sa three-digit increase ang maaprubahang umento at posible umanong manatili lamang sa two digits.
Sa kabila nito, patuloy pa ring isinusulong ng mga labor group ang ₱200 wage hike kahit aminado silang mas mababang dagdag-sahod ang karaniwang ipinapatupad ng wage boards.
Sa kasalukuyan, nasa ₱695 kada araw ang minimum wage sa NCR matapos ang huling umentong ipinatupad noong Hulyo 18, 2025. —sa panulat ni Jordan Gutierrez
