Iginiit ni Samahang Industriya ng Agrikultura o Sinag Executive Director Jayson Cainglet na kailangang maramdaman ng mga mamimili ang pagbaba ng presyo ng bigas sa bansa dahil 50-percent anya ang ibinagsak ng presyo nito sa pandaigdigang pamilihan mula pa noong 2024.
Ayon kay Cainglet, kung susundin ang trend sa world market, dapat nasa 35-pesos hanggang 40-pesos kada kilo lamang ang presyo ng imported na bigas sa bansa.
Subalit sa pinakahuling Bantay Presyo ng Department of Agriculture, nananatiling nasa 40-pesos hanggang 46-pesos kada kilo ang regular milled rice sa Metro Manila, habang nasa 50-pesos hanggang 59-pesos ang kada kilo ng premium white rice.
Bukod sa bigas, binigyang-diin ni Cainglet ang pangangailangang bantayan ang presyo ng isda, lalo na sa bagsakan sa Navotas City, kung saan tumaas ang presyo ng galunggong na nasa 140-pesos hanggang 180-pesos kada kilo.
Nanawagan ang Sinag na mas paigtingin ng pamahalaan ang monitoring at regulasyon upang matiyak ang pagbaba ng presyo ng mga pangunahing produktong pagkain tulad ng bigas at isda.
