Nanawagan sa Senado si Tingog partylist Rep. Jude Acidre na ikunsidera o isama sa kanilang mga prayoridad ang pagpasa sa House Bill 4744 o panukalang magbibigay ng pagkakataon sa mga mag-aaral na nasa poor at middle-income families na makapag-enroll sa mga private school sa pamamagitan ng voucher program ng pamahalaan.
Ayon kay Acidre, naipasa na ito sa Kamara sa ikatlo at huling pagbasa noong Oktubre ng nakaraang taon na kabilang sa priority bills ng Marcos administration sa ilalim ng Legislative-Executive Development Advisory Council o LEDAC measures na ipinanukala ni dating House Speaker Martin Romualdez.
Sa ilalim ng panukala, bubuo ng private education voucher program mula kindergarten hanggang high school para sa mahihirap pero deserving na mga mag-aaral.
Sa pamamagitan ng programa, mabibigyan ang mga kwalipikadong estudyante at kanilang mga magulang ng pagkakataong makapili ng papasukang eskwelahan na magmumula sa listahan ng DepEd.
Bukod dito, ay mabibigyang-tulong din ng panukala ang mga guro sa pamamagitan ng trainings, scholarships, research grants, at professional development programs.
Magkakaroon din ng tinatawag na Bureau of Private Education sa ilalim ng departamento na mamamahala sa lahat ng concerns sa basic education.
