Transplant ang pag-asa ng mga taong nahaharap sa isang malubhang sakit kagaya ng lang ng mister sa kwentong ito na kailangan ng liver transplant para madugtungan ang kaniyang buhay.
Matapos malamang matching donor ang kaniyang misis, kinausap niya ito para mag-donate, pero sa hindi inaasahan, tumanggi ang babae.
Nakumbinsi kaya ng mister ang kaniyang misis para tuluyang maging donor? Eto.
Isang lalaki mula sa South Korea ang na-diagnose ng primary biliary cirrhosis, isang rare liver disease at mayroon na lamang siyang isang taon para mabuhay kapag walang liver transplant.
Dahil sa kagustuhang mailigtas ang lalaki, binenta ng kaniyang mga magulang ang kanilang bahay at inalagaan din siya ng kaniyang misis.
Pero isang himala ang dumating sa buhay ng lalaki matapos madiskubreng mahigit 95% ang compatibility ng Human Leukocyte Antigen o H-L-A ng kaniyang misis para maging donor.
Pero gumuho ang mundo ng mister nang tumanggi ang kaniyang misis para maging donor dahil mayroon umano siyang phobia sa karayom at sharp objects kaya hindi niya raw kakayanin ang surgery.
Dahil dito, naramdaman ng mister na siya’y pinagtaksilan ng kaniyang asawa at inisip na gusto lang siya makitang mahirapan at mamatay.
Buti na lang, mayroong brain-dead na pasyente ang naging donor ng lalaki at matagumpay namang naisagawa ang liver transplant.
Pagkatapos ng operasyon ng lalaki, nagsimula siyang imbestigahan ang kaniyang asawa at naghain ng kasong “malicious abandonment” at divorce dahil umano sa kaniyang naramdamang betrayal.
Nilinaw naman ng misis na hindi totoo na mayroon siyang phobia sa karayom, bagkus, takot lang daw siyang maiwan ang kanilang dalawang anak kung may mangyayari man sa kaniyang hindi maganda habang isinasagwa ang transplant.
Matapos ang masusing imbestigasyon, pinaburan ng korte ang desisyon ng misis at sinabing ang organ donation ay hindi sapilitan kahit sa mag-asawa.
Dagdag pa ng korte, reasonable rin umano ang rason ng babae dahil sa takot na maaaring maiwan ang kanilang mga anak at iniisip lang niya ang kapakanan ng mga bata.
Napagdesisyunan ng mag-asawa na mag-divorce na lang habang nasa pangangalaga naman ng babae ang mga bata at patuloy pa ring nagbibigay ng financial support para sa medical recovery ng kaniyang ex-husband.
Ikaw, anong gagawin mo kung tatanggi rin ang iyong asawa sa pagdo-donate ng organ?
