Posibleng ikunsidera ng pamahalaan ang paggamit sa isang United Nations Anti-Corruption Convention na pinagtibay noong 2003 upang matunton at madakip si dating Ako Bicol Representative Zaldy Co.
Sa panayam ng DWIZ, sinabi ni Senate President Pro Tempore Panfilo “Ping” Lacson na mahigit isandaang bansa ang lumagda sa UNCAC kaya maaaring maging mas madali ang paghahanap at pag-aresto sa dating mambabatas kung hihingi ng tulong ang Pilipinas sa iba pang mga signatory country.
Maaari rin anyang suriin ng Office of the Ombudsman, Department of Justice, at Department of Foreign Affairs ang opsyong ito upang humingi ng tulong mula sa ibang mga bansang kasapi ng kasunduan.
Dagdag pa ni Senator Lacson, maaaring ipatawag ng Senate Blue Ribbon Committee, na kanyang pinamumunuan, ang mga dokumentong narekober ng National Bureau of Investigation mula sa condominium unit ni Co upang makumpleto ang mga rekord ng komite at makatulong sa mga hakbangin ng lehislatura.
