Nananatiling buhay at hindi pa patay ang Independent Commission for Infrastructure (ICI) matapos ang pagbibitiw ni dating Public Works and Highways Secretary Rogelio “Babes” Singson bilang commissioner.
Tugon ito ni Public Works and Highways Secretary Vince Dizon taliwas sa pahayag ni House Senior Deputy Minority Leader at Caloocan 2nd District Rep. Edgar “Egay” Erice na “patay” na ang ICI sa pagbibitiw ni Singson.
Ayon kay Secretary Dizon, nakita naman sa dami ng isinumite at inihain g referral ng komisyon na aabot sa dalawampung personalidad ang pina-iimbestigahan pinakakasuhan sa Ombudsman sa isyu ng maanomalyang flood control projects, patunay na buhay pa ang ICI.
Ibinunyag naman ng kalihim na batid na niya ang pagbibitiw ni Singson ilang linggo bago ito magsumite ng resignation.
Sa kabila nito, nabanggit anya ni Singson sa kanya na nais pa rin nitong tumulong sa gobyerno, partikular sa DPWH, lalo’t ipatutupad na ng kagawaran ang flood control master plan na sinimulan noong siya pa ang kalihim.
Magugunitang dumalo pa si Singson sa pulong ng Technical Working Group na binuo ng DPWH upang ipatupad ang kanyang master plan.
