Ibinasura ng Sandiganbayan ang mosyon ng ilang Department of Public Works and Highways officials na kanselahin ang pag-isyu ng arrest warrants laban sa kanila.
Sa resolusyong inilabas ng Sandiganbayan 5th Division, hindi pinagbigyan ang mosyon na inihain nina Gene Ryan Altea, Ruben Santos, Dominic Serrano, Montrexis Tamayo, Juliet Calvo, Dennis Abagon, at Lerma Cayco.
Ang mga nasabing indibidwal ay mga opisyal ng DPWH Mimaropa at nasasangkot sa sinasabing anomalya sa 290 million pesos road dike project sa Naujan, Oriental Mindoro.
Sinabi ng mga DPWH official sa kanilang mosyon na hindi sila nabigyan ng kopya ng resolusyon ng Ombudsman bago ito magsampa ng kaso.
Nabatid na noong Nobyembre a-disi otso nang ianunsyo ni Assistant Ombudsman Mico Clavano na nag-isyu na sila ng resolusyong naglalaman ng probable cause para makapaghain ng kaso laban sa mga nabanggit na DPWH Mimaropa officials at dating Ako Bicol Rep. Zaldy Co dahil sa maanomalyang flood control projects.
Bagama’t, ayon sa mga nag-mosyon, nabigyan lamang sila ng kopya nito noong Nobyembre a-disi nuwebe.
Iginiit din ng mga ito na kasalukuyan pang tinatapos ang 290 million pesos flood control project.
Gayunman, ibinasura pa rin ng Sandiganbayan ang kanilang mosyon dahil sa kakulangan sa ligal na merito.
