Kasabay ng pagdiriwang ng National Children’s Month, nakipagtulungan ang Batang Juan Network, policy advocacy arm ng 1-Munti Partylist, sa Child Rights Network (CRN) sa pamamagitan ng Philippine Legislators’ Committee on Population and Development (PLCPD).
Layunin nitong isulong ang mas matibay na mga batas na poprotekta sa karapatan ng bawat batang Pilipino.
Nakipagpulong ang grupo kina Congressmen Jess Marquez ng Aklan, Tony Roman ng Bataan, at Dino TanjuaTco ng Rizal upang talakayin ang dalawang mahalagang panukalang batas sa 20th Congress.
Ito ang Magna Carta of Children at Universal Birth Registration Act na layuning matiyak na bawat bata ay may ligal na pagkakakilanlan, proteksyon, at patas na oportunidad upang mamuhay nang may dangal at seguridad.
Ayon kay Dr. PJ Javier, co-convener ng Batang Juan Network, ang pakikipagtulungan sa CRN at PLCPD ay nagpapalakas sa kanilang adbokasiya para sa mga polisiyang nakabatay sa ebidensya at tunay na nakasentro sa karapatan ng mga bata.
Binigyang-diin sa pulong ang kahalagahan ng birth registration bilang unang hakbang sa pagkamit ng mga pangunahing serbisyo gaya ng edukasyon at kalusugan.
Kahit hindi anya nakapasok sa Kongreso ang 1-Munti noong halalan 2025, patuloy anilang isinusulong ang kanilang mga plataporma para sa kabataan, dahil bawat bata ay dapat kilalanin, pakinggan, at pangalagaan.
