Muling ipinagtanggol ng Malacañang ang itinatag na Independent Commission for Infrastructure ni Pangulong Ferdinand Marcos Jr. sa harap ng puna at kwestyon ng ilang opisyal sa integridad nito sa pag-iimbestiga sa anomalya sa mga infrastructure projects ng pamahalaan.
Ayon kay Palace Press Officer at Communications Usec. Claire Castro, maipapakita ang pagiging independent ng komisyon kung ito ay magiging impartial o walang kinikilingan, kinakampihan, at tinatanggap na suhol para ipagtanggol ang mga sangkot.
Nabatid na kinuwestyon ni Sen. Rodante Marcoleta ang pagsandig ng I.C.I. sa mga ahensya ng pamahalaan para sa imbestigasyon.
Nilinaw ni Usec. Castro na kailangan pa ring makipag-ugnayan ang I.C.I. sa mga ahensya upang makakuha ng impormasyon at dokumento, lalo na kung makatutulong ito sa imbestigasyon.
Tiniyak naman ng Malacañang na hindi makokompromiso ang trabaho ng I.C.I. dahil sa pakikipag-ugnayan nito sa mga ahensya at maging sa Kongreso.
— sa panulat ni John Riz Calata
