GINAWARAN ng parangal ang batikang mamamahayag na si Gadmer “Mer” Layson sa Australia para sa pagsusulong ng agrikultura at pagpapaunlad ng komunidad.
Pinarangalan ng Global Filipino Achievers Awards si Layson, kilala bilang Magsasakang Reporter, ng Excellence in Media Agriculture and Community Empowerment dahil sa masigasig niyang adbokasiya na itaguyod ang urban at backyard gardening upang makapagtanim ng sariling pagkain sa buong bansa.
Si Layson ang host ng programang “Masaganang Buhay” na napapanood sa OnePh, Cignal TV Channel 1, at RPTV ng TV5.
Maliban dito, isa rin siyang kolumnista at mamamahayag sa Pilipino Star Ngayon (PSN) ng Star Group of Publications.
Aktibo rin si Layson bilang vlogger at content creator sa YouTube, kung saan milyun-milyong views ang naaani ng kanyang mga video tutorials ukol sa organikong pagtatanim ng iba’t ibang uri ng halaman—patunay sa malaking interes at pangangailangan ng publiko sa ganitong kaalaman.
Ang prestihiyosong parangal ay idinaos sa Strangers Room ng NSW Parliament House sa Sydney, Australia noong gabi ng Hunyo 20, 2025.
Bagama’t hindi personal na nakadalo si Layson, buong puso siyang nagpasalamat sa pamunuan ng Global Filipino Achievers Awards.
Aniya, iniaalay niya ang pagkilalang ito sa Diyos at sa lahat ng kanyang taga-suporta—mula sa mga manonood ng “Masaganang Buhay,” mambabasa ng kanyang kolum sa PSN, at mga subscribers sa YouTube at social media.
Si Layson, tubong Mexico, Pampanga, ay hindi na bago sa pagtanggap ng pagkilala. Siya rin ay ginawaran bilang Most Outstanding Farmer of the Philippines ng TOFAR, naging awardee ng BCYF Foundation, DOST Galing Pinoy, FISPC, at 9th Asia Pacific Luminaries Awards.
