Tiwala ang Metropolitan Waterworks and Sewerage System, na hindi sasadsad sa critical level ang water level sa mga dam partikular na sa Angat dam na pangunahing pinagkukuhanan ng tubig sa malaking bahagi ng Metro Manila.
Ayon kay Engineer Patrick Dizon, Division Manager ng mwss, nasa 175 hanggang 176 meters lang ang kayang isagad sa lebel ng tubig sa angat dam batay narin sa pag-aaral na ginawa Ng Inter-Agency Technical Working Group.
Ganito din ang naging projection ng mga kinatawan ng PAGASA Weather Bureau, National Water Resources Board, National Irrigation Administration at iba pang ahensya ng gobyerno.
Sinabi ni Engr. Dizon, na maiiwasan ang pagsadsad sa critical level ng mga dam dahil mayroong dalawa hanggang apat na bagyo ang inaasahang magpapaulan sa bansa ngayong buwan, na tutulong sa water elevation sa mga reservoir.
Sakali namang kulangin ang suplay ng tubig, tiniyak ng division manager, na magkakaroon ng rebate ang 2 water concessionaires para sa mga customer na maapektuhan ng water interruption.
Sa kabila nito, nanawagan sa publiko ang MWSS, na patuloy na magtipid sa paggamit ng tubig dahil tatagal pa ang epekto ng El Niño hanggang sa ikalawang quarter ng taong 2024.
