Nanawagan ang mga onion farmers na itigil muna ng gobyerno ang pag-angkat at pagbebenta ng mga imported na sibuyas sa susunod na mga buwan.
Ito’y dahil sa lubhang naapektuhan ng pag-import ng sibuyas noong Enero kung saan mas murang naibenta ang mga ito kumpara sa kanilang mga lokal na ani.
Nitong lang Martes, Marso a-28, dumating sa tanggapan ng Department of Agriculture (DA) ang nasa 100 kilo ng sibuyas mula sa Bongabon, Nueva Ecija na nakatakdang ibenta sa Kadiwa store.
Nakipagtulungan ang iba’t ibang parokya sa Quezon City sa Agriculture Department para madaling maihatid sa simbahan ang mga aning sibuyas, bigas at kamatis na manggagaling mula na mismo sa mga lokal na magsasaka.
Ayon kay DA Assistant Secretary James Layug, layon nitong masolusyunan ang problema sa transportasyon at traders ng mga magsasaka.
Direkta aniyang maihahatid ang mga ani kaya mababa na lamang ang presyo nito.
Sinabi pa nito na malaking bagay ang partnership ng DA at ng parokya para maibenta sa tamang halaga ang mga ani ng mga magsasaka at inaasahang tataas ang kita ng mga ito.
