Pumalo na sa 211 ang bilang ng mga naitalang firecracker-related injury matapos ang pagsalubong ng bagong taon dahil sa pinsalang dulot ng paputok.
Ayon sa DOH, karagdagang 74 na pasyente ang naitala mula sa 61 DOH sentinel hospitals.
Sinabi ng ahensya na ang panibagong kaso ay mas mataas ng 16% kumpara sa naitalang 182 noong nakaraang taon pero mas mababa naman ng 30% kumpara sa five-year average na 300 cases sa kaparehong panahon.
Nangunguna pa rin sa may pinaka maraming naiatalang kaso ang National Capital Region (NCR) na mayroong 102; 25 mula sa Region 6; 20 sa Region 3; 13 sa Region 1; tig-11 ang CALABARZON at Region 5; walo sa Region 2; anim sa Region 7; lima ang mula sa Region 12; apat ang nagmula sa Cordillera Administrative Region (CAR); tig-dalawa ang MIMAROPA at Region 11; at tig-isa naman ang Region 9 at Region 10.
Habang wala namang naitalang nabiktima ng paputok sa mga lalawigan ng Region 8, Caraga at BARMM.
Sa kabila nito, nagpaalala sa mga magulang ang DOH na bantayang maigi ang kanilang mga anak at kung maaari ay huwag pulutin ang mga makikitang natirang mga paputok sa mga kalsada dahil delikado ang mga ito.
Sakali namang masugatan dahil sa paputok, agad na magpunta sa pinakamalapit na ospital para mabigyan ng tama at agarang lunas.