Naglabas ng guidelines ang Department of Education (DEPED) para sa mga pampublikong paaralan na humihiling ng exemption sa pagpapatupad ng full in-person classes.
Nilagdaan ni Vice President at Education Secretary Sara Duterte ang DEPED order no. 50 series of 2022 na nagtatakda ng operational guidelines para sa extension ng implementasyon ng blended learning modality sa piling public elementary at secondary schools.
Maaaring palawigin ang blended learning modality sa isang paaralan kung naantala ang pagsasaayos o konstruksyon ng school facilities dulot ng kalamidad, gayundin ang mga paaralang kailangan ng agarang relocation matapos ideklara ng mines and geosciences bureau na hindi ligtas gamitin ng mga mag-aaral.
Papayagan din ang mga eskwelahan na may kakulangan sa basic education inputs at resources.
Sinabi pa ng ahensya na ilang paaralan ang hindi makapagpatupad ng full face-to-face classes dahil ginagamit ang mga ito bilang temporary evacuation centers.
Batay sa pinakahuling datos ng DEPED, 53 sa 827 public schools sa National Capital Region (NCR) na magpatuloy sa blended learning habang 94% o 774 na paaralan sa Metro Manila ang nagpatupad na ng five-day face-to-face classes simula noong November 2.
