Hindi pa rin nadadanan ang nasa 27 kalsada sa mga rehiyon na tinamaan ng bagyong Paeng.
Base sa monitoring ng Department of Public Works and Highways (DPWH), pito rito ay mula sa Cordillera Administrative Region (CAR), lima sa Region 2, isa sa Region 3, dalawa sa Region 4-A, lima sa Region 6, isa sa Region 8, tatlo sa Region 12 at tatlo sa Bangsamoro Autonomous Region in Muslim Mindanao (BARMM).
Ayon kay DPWH Secretary Manuel Bonoan, isinara ang mga kalsadang ito dahil sa mga landslide, pagbaha, nasirang tulay at iba pa.
Tiniyak naman ng kalihim sa publiko ang tuloy-tuloy na clearing at rehabilitation operation sa lahat ng apektadong imprastrutura sa bansa.
