Hindi malayong makapasok sa Pilipinas ang XBB Omicron subvariant.
Ito ang ibinabala ng Infectious Disease Expert na si Dr. Rontgene Solante, lalo’t bukas aniya ang borders ng bansa at araw-araw ay mayroong flight patungong Singapore.
Batay sa mga report, nakararanas ng surge ng COVID-19 cases ang naturang bansa bunsod ng XBB subvariant.
Ayon pa kay Solante, ang naturang subvariant ay pinaniniwalaang “highly immune-evasive”, kung saan maaari pa ring ma-infect ang mga indibidwal na may antibodies laban sa COVID-19.
Sa kabila nito, sinabi ng eksperto na batay sa datos ay hindi naman napupuno ang healthcare facilities sa Singapore.
Matatandaang sinabi ng Department of Health (DOH) kahapon na wala pang natutukoy na XBB subvariant sa Pilipinas.