Kasabay ng pagtatapos ng libreng sakay program ng pamahalaan, hindi narin palalawigin ang libreng antigen test ng pamunuan ng MRT-3.
Tatapusin na ang naturang testing sa Hunyo a-30 kasabay rin ng pagbaba sa pwesto ng Administrasyong Duterte.
Ayon sa MRT-3 management, samantalahin na ang libreng antigen test sa mga istasyon ng Shaw Boulevard at North Avenue na sisimulan mula alas-7 hanggang alas-8 ng umaga.
Mayroon ding libreng antigen test sa istasyon ng Araneta-Center Cubao at Shaw Boulevard na sisimulan naman ng alas-4 hanggang alas-5 ng hapon.
Matatandaang noong Enero, inilunsad ng pamunuan ng MRT-3, ang libreng antigen test sa pakikipagtulungan ng Department of Transportation (DOTr) na may layuning masigurong ligtas ang mga mananakay.
