Iniimbestigahan na ng Department of Environment and Natural Resources ang JVA Housing Project sa lupaing inilaan ng local government upang paglipatan ng New Bilibid Prison at Regional Office ng DENR sa Tanay, Rizal.
Ang nabanggit na lupa ay bahagi ng Lot 10 na nakapangalan sa gobyerno at may lawak na 300 hectares, kung saan 270 dito ay nakalaan sa NBP habang ang 30 hectares ay tatayuan ng DENR-Regional Office 4-A.
Gayunman, nakapaloob ito sa isang Joint Venture Agreement ng Kagawaran at Blue Star Development Corporation na ngayon ay tinaguriang Garden Cottages, Masungi Georeserve Foundation.
Ayon kay Ramil Limpiada, Provincial Environment and Natural Resources officer, mayroon nang binuong investigating body ang DENR upang tutukan ang issue.
Mismong si Undersecretary Ernesto Adobo ang namumuno sa investigating body para rebisahin ang kasunduan kabilang ang assistant secretary legal biodiversity management at iba pang miyembro ng komite.
Ang pagkadeklara anya sa lupaing paglilipatan ng NBP at DENR-Regional Office ay alinsunod sa bisa ng Proclamation 1158 ni dating Pangulong Gloria Arroyo noong September 8, 2006.
Ito ay nakapaloob sa JVA noong panahon ni dating DENR secretary Heherson Alvarez.
