Hindi sasantuhin ng Philippine National Police (PNP) ang sinumang tauhan nito na nasasangkot o nalululong sa kontrobersyal na e-Sabong.
Ito’y matapos lumutang sa pagdinig ng Senate Committee on Public Order and Dangerous Drugs kamakailan ang naging pagbubunyag ng ilang testigo na nagdadawit sa ilang mga Pulis na nasa likod ng pagkawala ng mga Sabungero.
Ayon kay PNP Public Information Office Chief, P/BGen. Roderick Alba, kailangang isailalim sa masusing validation ang mga impormasyong ibinunyag ng mga testigong humarap sa pagdinig ng Senado upang mabigyan ng due process ang mga masasangkot.
Kumpiyansa ang PNP na lalabas din ang katotohanan sa likod ng mga paratang laban sa ilan nilang kabaro dahil sa pagkawala ng ilang sabungero.
Kasabay nito, muling nagbabala si Alba sa mga Pulis na mahigpit ang bilin ni PNP Chief P/Gen. Dionardo Carlos sa lahat ng tauhan ng Pulisya na huwag magsusugal, on duty man o hindi. – ulat mula kay Jaymark Dagala (Patrol 9)