Dinala sa Makati Medical Center ang actor na si Diether Ocampo, makaraang maaksidente sa service road ng Osmeña Highway sa Brgy Pio. Del Pilar sa nasabing lungsod.
Nabatid na minamaneho ng aktor ang kanyang SUV Ford Explorer nang bumangga ito sa nakahintong truck ng basura.
Ayon sa Bantay Bayan ng Brgy Pio Del Pilar na si Joel Alicante, mabilis ang takbo ng SUV nang baybayin ang service road ng Osmeña Highway pasado ala una ng madaling araw.
Sa lakas ng impact, wasak ang kaliwang harapan ng SUV dahilan ng ikinasugat ng aktor sa noo at paa.
Ayon pa kay Alicante, amoy alak si Ocampo at walang malay ng hugutin mula sa driver seat ng SUV.
Ayon sa driver ng basura na si Lauro Bañaga, nagulat nalang sila nang may kumalabog sa likuran ng truck habang sila ay abala sa pagkuha ng basura.
Patuloy ang imbestigasyon ng mga otoridad sa insidente. —sa ulat ni Gilbert Perdez (Patrol 13)
