Dalawa ang arestado habang aabot sa 5,637 na piraso ng party drugs na ecstacy ang nasamsam ng mga tauhan ng mga awtoridad.
Ito’y sa isinagawang interdiction operarion ng mga tauhan ng PDEA Regional Office-NCR NAIA Inter-Agency Drug Interdiction Task Group (IADITG) sa Quezon City Central Post Office, Brgy. Pinyahan sa naturang lungsod.
Kinilala ni PDEA NCR Dir. Christian O. Frivaldo ang mga naarestong sina Ma. Isabella Albano, 27, taga-Quezon City at Jessica Muñoz, 27 taga-Bacoor, Cavite.
Idineklara bilang mga lauran at damit pambata mula sa Germany ang dumating na parcel subalit nang inspeksyunin iyon, tumambad sa loob ng isang foot massager ang nabanggit na mga party drugs na nagkakahalaga ng Php 9,582,900.00 .
Dahil dito, ikinakasa na ang kasong paglabag sa Republic Act 9165 o ang Comprehensive Dangerous Drugs Act of 2002 laban sa mga naaresto. —ulat mula kay Jaymark Dagala (Patrol 9)
