Binatikos ng ilang mambabatas ang ginawang pagpapabakuna ni special envoy to China Mon Tulfo ng COVID-19 vaccine ng Sinopharm kahit hindi pa ito otorisadong gamitin sa bansa.
Ayon kay Bayan Muna Representative Carlos Zarate, dapat itong maimbestigahan at hindi maipagsawalang bahala.
Binigyang diin ni Zarate ang pag-amin ni Tulfo na “smuggled” o puslit ang ginamit na bakuna ni Tulfo dahilan lalo para ito busisiin.
Itinuturing naman ni Rep. Ferdinand Gaite na VIP vaccination ang ginawa ni Tulfo.
Giit nito, wala pang bakuna para sa mamamayan pero ang mga alipores ng administrasyong Duterte ay tuloy-tuloy sa pagpupuslit ng bakuna na tila hindi nahihiya sa kanilang ginagawa sa halip ay ipinagyayabang pa.
