Ikinatuwa ng isang mambabatas ang desisyon ng Inter-Agency Task Force (IATF) na pansamantala munang hindi obligahin ang mga nakatatanda na personal na magpakita o personal appearance sa pension-issuing agencies para hindi maantala ang pagtanggap ng mga ito ng kani-kanilang pensyon.
Ayon kay Senior Citizen Partylist Representative Rodolfo Ordanes, sa naturang hakbang ng IATF, panigurado aniya na mapapanatag ang loob ng mga nakatatandang pensioners.
Dagdag pa ni Ordanes, dahil sa banta ng pandemya, delikado pa sa ngayon na lumabas ang mga nakatatanda.
Kaya’t paliwanag ni Ordanes, sa naging desisyon ng IATF matutulungan nito ang mga nakatatanda para mabawasan ang mga intindihin ng mga ito.
Bago pa nito, umapela si Ordanes sa pension-issuing agencies gaya ng GSIS at SSS na hindi na obligahin ang mga senior citizens personal na magpakita sa mga tauhan ng mga ahensyang ito para patuloy na matanggap ang kanilang mga pensyon.